जाये केबा बारी - अनिरुद्ध कुमार
अबका बोलेलू ये मैना, करतानी तैयारी।
आगे पीछे अबका सोंचीं, जाये केबा बारी।।
सुखदुख से जीवन नहलइनी,
सजधज बनठन के इतरइनी,
भाव भावना के सुर गइनी,
दंभ द्वेष मनसे बिसरइनी।
माया काया अबका बोलीं, खत्म हो गइल पारी।
आगे पीछे अबका सोंचीं, जाये केबा बारी।।
राग रंग सुर ताल बजइनी,
नाच नाचके मन बहलइनी,
तनमन जीवन के हर्षइनी
पाप पुन्य के भेद बतइनी,
तज देनी सब थाती आपन, व्यर्थ के मगज मारी।
आगे पीछे अबका सोंचीं, जाये केबा बारी।।
हो अइनी सब काबा काशी,
मथुरा वृंदावन या झाँसी,
अभिलाषा बैरी रंगरासि,
जब जब देखीं आवे हाँसी।
केबा इहवाँ बोलीं आपन, सबके बा लाचारी।
आगे पीछे अबका सोंचीं, जाये केबा बारी।।
शाम सुबह नित आये जाये,
कभी हँसाये कभी रुलाये,
धरती अंबर के भरमाये,
जीवन के हर रूप दिखाये,
काल तनिक ना समय गवाये, ले जाये मन मारी।
आगे पीछे अबका सोंचीं, जाये केबा बारी।।
- अनिरुद्ध कुमार सिंह, धनबाद, झारखंड